Jelsa kyrkje og skulemuseet

På staden der kyrkja står i dag har det også tidlegare vore ei stavkyrkje som er nemnd i kjelder så tidleg som 1286. I dag er Jelsa kyrkje ein flott trebygning, som har fått eit heilt unikt preg med målekunsten til Gottfried Hendtzcel. Kyrkjetaket er dekka som ein stjernehimmel med tusenvis av stjerner som fint komplementerer flotte utsmykkingar på vegger, benker og dekorasjonar. Om sommaren kan ein få med seg guida tur i kyrkja med vertskap der ein kan læra om den litt turbulente historia til leiarane i kyrkja for mange hundre år tilbake, om krusifikset og om korleis kyrkjelyden var delt inn med ei kvinneside og ei mannside: kvinnene sat ofte på den sida som ikkje hadde sollys.

Skulemuseet like ved kyrkja kom opp i 1774, og er eit av dei første skulebygga i Ryfylke. Skulen blei sett opp med midlar frå "Den Riibergske Stiftelse" som blei oppretta av Marcille Riiberg i 1755. Bygget var skule for ungdommar som seinare skulle ut som lærarar i omgangsskulen, og seinare fungerte bygget som ein barneskule. Dei siste elevane gjekk ut på 1900-talet. På guida turar vil vertskapet fortelje om kor viktig dette bygget var i utdanninga i regionen, og kanskje får ein også høyra musikalske innslag!